Tolkien.ge

დიდი ხნის წინ დაგეგმილი ეს გამოცემა საბოლოოდ გამოჩნდა 2009 წლის ნოემბერში. სასიამოვნო ყდის მქონე ეს წიგნი აღჭურვილია შუამიწეთის მესამე ეპოქის ერთ-ერთი რუკით, ავტორის წინასიტყვაობით, მისი ბიოგრაფიით და მთარგმნელის ანოტაციებით. თარგმანი კვლავ ნიკა სამუშიას ეკუთვნის. გამოცემულია გია ქარჩხაძის გამომცემლობის მიერ.
თარგმანი ატარებს ტოლკინის სამყაროს ნაცნობ სულს, მიუხედავად საკმაოდ ხშირი შეცდომებისა (გამოტოვებული ასოები ამა თუ იმ სიტყვაში თუ სასვენი ნიშნები). იკითხება თავისუფლად და დიდი ინტერესით, გეოგრაფიულ ადგილებზე მოძრაობის აღწერა არ არის მკითხველისათვის დამღლელი.

ტოლკინის ამ შედევრის ქართულად გამოცემა ოთარ ყარალაშვილის გამომცემლობამ დაამთხვია ფილმის 'ბეჭდის საძმო' გამოსვლას. თავად წიგნის შეძენა შესაძლებელი იყო როგორც კინოტეატრში, ასევე წიგნის მაღაზიებში.
წიგნი ფრიად მოწიწებით არის ნათარგმნი. ახლავს ავტორის ყველა შავ-თეთრი ილუსტრაცია და ორი რუკაც - როგორც თრორის, ასევე ველურმიწეთის (ამ ვარიანტში მას 'ველური მხარე' ეწოდება). უშუალო ტექსტის თარგმანი ნინო ბარძიმიშვილს ეკუთვნის, ხოლო ლექსების - თინათინ გოგოჩაშვილს. ტოლკინის გვარი მითითებულია, როგორც 'ტოლკიენი'.
წიგნის გარეკანზე გამოტანილია, როგორც ეტყობა, კოლაჟის მეთოდით შემუშავებული სურათი - ესგაროთის გამოსახულებით. სადღაც შორს ეულ მთასაც ვხედავთ. ფაქტია, რომ ჰობიტის არც ერთი გამოცემა ასეთი ჯერ არ ყოფილა და 2002 წლის ამ ვერსიას ამ მხრივ თავისი უპირატესობაც კი გააჩნია. წიგნის უკანა ყდა ეთმობა მცირე ციტირებას რომანიდან - კონკრეტულად კი, იმ სეგმენტისა, სადაც აღწერილია გამოქვაბულში წამოწოლილი სმაუგი.
საგულისხმოა, რომ წარწერები რუკებზე არის შესრულებული არა ნაბეჭდი, არამედ ხელნაწერი შრიფტით. წიგნის გამოცემა ოფიციალურად შედგა, საავტორო უფლებების გათვალისწინებით და გამომცემლობასთან Allen & Unwin შეთანხმებით. წიგნს საკუთარი ISBN ნომერი გააჩნია - 99928-0-302-0. გვერდების რაოდენობა - 269. ფერადი ილუსტრაციები არ არის.